Manningin skal hava sítt hóast virki keypa

Nú fyrstu virkini hava keypt fiskirættindi á uppboðssølu, ger Fiskimannafelagið vart við, at tað fer at seta fram endurgjaldskrav vegna manningarnar, um tær verða avroknaðar fyri minni enn marknaðarprís.

Bæði Vestmanna Seafood og Pelagos, sum keyptu fiskirættindi í gjár, siga, at manningin á Fram, sum skal fiska makrelin hjá virkjunum, verður ikki við sviðusoð.

Fiskimannafelagið óttast snildir

Verður Fiskimannafelagið varugt við, at snildir verða nýttar, so avreiðingarvirðið, sum manningin skal avroknast eftir, ikki samsvarar við marknaðarprísin, fer felagið alt fyri eitt at krevja endurgjald fyri manningina, sum missir, skrivar felagið á heimasíðuni.

Fiskimannafelagið heldur tað vera neyðugt alment at minna allar núverandi og komandi aktørar í fiskivinnuni á ófrávíkiligu grundregluna í býtissáttmálunum, sum felagið hevur við Føroya reiðarafelag og einstakar reiðarar.

Henda grundregla sigur, at reiðarí og manning í felag hava ábyrgd av bæði at fáa sum mest av fiski til høldar og fáa bestan marknaðarprís fyri veiðuna, sum reiðarí og manning í felag eiga. 

Manningin verður tí avroknað eftir veruliga avreiðingarvirðinum.

Fyrsti makrelurin longu komin  

Sambært jn.fo er Fram komin inn í dag við 320 tonsum av makreli.

100 tons verða landað til Vestmanna Seafood og 220 tons til Pelagos.

Vestmanna Seafood keypti í gjár rættin at fiska 200 tons og Pelagos í Fuglafirði 500 tons fyri 3,11 kr. kilo.

Harafturat kemur tað, sum Fiskamarknaðurin fær fyri at selja, so prísurin kemur upp í 3,15 kr.