Partafelag tikið aftur úr Skiftirættinum

Partafelagið Seta, sum eigur garnakipið Anitu, er tikið úr Skiftirættinum, sum fekk tað frá Skráseting Føroya til tvingilsavtøku síðst í august.

Skrásetingin fekk í gjár eina fráboðan um, at P/f Seta heldur fram, og Skiftirætturin hevur ikki longur ábyrgd av felagnum.

Skrásetingin fekk at vita, at viðtøkurnar hjá felagnum eru broyttar fyri einum mánað síðani.

Felagið eitur nú Seta aftur og ikki "Seta undir tvingsilsavtøku".

Nýggj nevnd

Í nevndini eru Jónas Sigmarsson í Havn, hann er eisini stjóri í felagnum, Anton Sigmarsson í Hoyvík og Angel Pego Vidal í Spania, sum er nevndarformaður.

Angel Pego Vidal var eisini í felagnum, áðrenn tað varð umskipað.

Partapeningurin hjá Seta er tvær milliónir og 275.000 kr.  

Endamálið hjá felagnum er at eiga og reka fiskiskip, fiskasølu, smiðjuvirksemi og annað yrki í sambandi við hetta.