Ráðgevi hjá Trump játtar seg sekan

Nógv rumbul er um Donald Trump og fyrrverandi ráðgevar hansara. Ein fyrrverandi ráðgevi er saman við starvsfelaga ákærdur fyri skattasvik og ráðagerð, og nú hevur fyrrverandi uttanríkispolitiski ráðgevin hjá amerikanska forsetanum játta seg sekan í at hava logið fyri samveldisløgregluni, FBI. 

Hetta upplýsir serligi ákærin, Robert Mueller, sum kannar málið um russisku uppíleggingina í amerikanska forsetavalstríðið í fjør.

Paul Manafort, sum eitt skifti stóð á odda fyri valstríðnum hjá Donald Trump, og ein felagi hansara, Rick Gates, eru settir í húsavarðhald. Teir eru m.a. skuldsettir fyri skattasvik og ráðagerð móti USA.

Báðir nokta seg sekar.

SÍ EISINI: Ráðgevi hjá Trump ákærdur fyri svik

Bæði Paul Manafort og Rick Gates góvu seg upp til samveldisløgregluna, og einum rættarfundi í Washington í gjár vórðu teir settir í húsavarðhald.

Teir kunnu tó verða latnir leysir móti veðhaldi.

Hevði samband við russiskan professara

Papadopoulos viðgekk 5. oktober, at hann hevði logið um tilknýtið til ein professara, ið hevði samband við Russland.

Í mars í fjør fekk Papadopoulos frænir av, at professarin hevði neiligar upplýsingar um demokratiska valevnið, Hillary Clinton, sum Papadopoulos kundi brúka til frama fyri Donald Trump.

George Papadopoulos varð avhoyrdur í januar í ár, og hann varð tikin í summar. 

Síðani gjørdi hann eftir øllum døma eina avtalu við FBI, helst fyri at fáa linari revsing.