- Tíðindi, mentan og ítróttur
Norðmenn finnast hvassliga at føroyskum skipum
![](https://kvf.fo/sites/default/files/styles/grein-ovasta-mynd/public/faroe_pelagic2.png?itok=bSX-ZDMQ)
Føroysk skip fiska frítt eftir uppsjóvarfiski. Kortini megna teir ikki at fiska kvoturnar upp, sum føroysku myndugleikarnir hava givið teimum, sigur stjórin í Fiskebåt, Audun Maråk.
Hann sigur, at meðan norsku uppsjóvarskipini fiska ein triðing av árinum, fiska føroysku uppsjóvarskipini alt árið. Orsøkin er, at kvoturnar eru so stórar, at uppsjóvarflotin í Føroyum hevur ilt við at fiska tær upp.
- Kvoturnar hjá teimum hava ikki festi í nøkrum veruleika. Teir fiska so nógv, sum teir kunnu, og senda rokningina til tey londini, sum ikki lata síni fiskiskip bera seg at á sama hátt, sigur Audun Maråk.
Hann heldur, at uppsjóvarskipini í ES og í Norra kundu havt fiskað nógv meira av uppsjóvarfiski, um tey fingu sama møguleika.
Audun Maråk sigur, at norðmenn hava rætt til nærum 80% av norðhavssildini, 35 prosent av makrelinum og næstan 30 prosent av svartkjaftinum, men hetta svarar ikki til tey rættindini, sum Norra hevur fingið í samráðingunum.
Norra átti at farið nógv harðligari fram.
- Vit eiga at royna at finna loysnir við samskifti á mest møguliga vísundaliga grundarlagnum og við reiðiligum og sakligum grundgevingum. Tíverri hava royndirnar víst, at góðar grundgevingar ofta ikki eru nóg mikið, sigur formaðurin í Fiskebåt.
Hann vísir á, at onnur strandalond, t.d. Ísland og Føroyar hava brúkt aðrar hættir at fáa stórar partar, og tað er við at krevja og fiska mest møguligt. Hetta hevur Ísland gjørt, og Føroyar hava seinastu árini valt somu framferð.
Audun Maråk sigur, at Norra eigur at tora betri at fara undir eitt stríð við hini strandalondini fyri at fáa meira í sín part.