Miðflokkurin vil hjálpa borgarstjórum í tingið

Ein nýggjur leikur er fluttur í drúgva talvinum um rættin hjá borgarstjórum eisini at vera í løgtinginum.

Miðflokkurin vil hava kommunustýrislógina broytta, so kommunustýrið ikki longur skal gera av, um borgarstjórin eisini kann vera løgtingslimur.

Lógin skal, sambært Miðflokkinum, siga, at borgarstjóri kann røkja onnur størv, sum eru beinleiðis fólkavald, tað vil siga borgarstjórin kann eisini vera løgtingslimur ella fólkatingslimur.

Miðflokkurin sigur, at ein borgarstjóri í fullum starvi, sum verður valdur á ting, eigur at kunna taka á seg tingstarvið, uttan at fáa loyvi frá einum meiriluta í einum kommunustýri til tess. 

Flokkurin heldur, at tað er í stríð við fólkaræðið, at nógv fólk kunnu velja fólk á ting, sum síðani ikki sleppa á ting fyri nøkrum fáum fólkum í einum kommunustýri.