Høgni Hansen er - fyribils - nevndarformaður í KNI

KNI er eitt alment partafelag, sum rekur bæði heilsølu og gerandisvøruhandlar í Grønlandi, umframt oljusølu umvegis almenna partafelagið Polar-oil.

Grønlendska heimasýrið eigur øll partabrøvini í fyritøkuni.

Niels Thomsen, sum hevur verið nevndarformaður, legði frá sær í vikuni. Orsøkin skal vera, at hann fer at brúka sína arbeiðsorku aðrastaðni.

Høgni Hansen verður nevndarformaður til nevndin skipar seg av nýggjum mikudagin. Hann kann ikki siga nú, um hann heldur fram sum formaður eftir tann fundin.

KNI er tann gamli kongaligi einahandilin í Grønlandi. Royal Arctic Line, Air Greenland, Royal Greenland og grønlendska postverkið hava fyrr verið partur av fyritøkuni.

KNI hevur í høvuðsheitum handilsfyritøkur í teimum økjunum, har privati marknaðurin ikki fær tað at bera seg.

KNI hevur umleið túsund starvsfólk og umsetur fyri 2,5 millardir krónur.

Høgni Hansen kom upp í nevndina hjá størstu grønlendsku handilsfyritøkuni í 2014. Hann er eisini stjóri hjá heilsøluni Poul Hansen.