Televeitarar átalu fyri lógarbrot ikki meldaðir tó

Bæði Føroya Tele og Hey hava fingið átalu frá Brúkaraumboðnum fyri at brota lógina um marknaðarføring.

Men televeitararnir verða ikki meldaðir til fútan, tí teir hava játtað at halda ásetingina um kredittkeyp í lógini. 

Brúkaraumboðið hevur mint Føroya Tele og Hey á at gera sær størri ómak, tá feløgini lýsa við møguleikanum at keypa vørur við kredittkeypi.

Krøv til lýsingar, sum bjóða kredittkeyp, til dømis tá telefon skal keypast, eru eitt nú, at lýsingarnar skulu upplýsa kontantprísin, mánaðarliga prísin fyri telefonina, um rindað verður í smáum, kostnað fyri stovning og kostnað í alt. 

Hesar upplýsingar hava feløgini lýst við, men tvær upplýsingar hava ikki verið í lýsingum hjá báðum feløgunum, sigur Brúkaraumboðið. 

Tær upplýsingarnar eru um árligu útreiðslurnar fyri kredittin í prosentum og kredittútreiðslurnar.

Kredittútreiðslur eru tað, sum tað kostar at læna ávísa upphædd.