Ein fótbóltsdystur er sum eitt hálvmaraton

Teir sveitta og eru pøstir, men er tað veruliga so strævið hjá spælarunum, sum vit í hesum døgum síggja kýta seg til HM í fótbólti, at renna eftir einum fótbólti í tilsamans 90 minuttir?

Jú, tað er.

Tað er niðurstøðan hjá fótbóltsgranskaranum og professaranum Peter Krustrup, sum eisini er granskingarleiðari á Institut for Idræt og Biomekanik á Syddansk Universiteti í Danmark. Hetta veit heimasíðan videnskab.dk at siga.

Sambært honum avrika fótbóltsspælarar tað sama, sum rennarar gera til eitt hálvmaraton.

Í miðal renna fótbóltsspælarar tó bert 14 kilometrar undir einum dysti, og tá er upphitingin tald við. Eitt hálvmaraton er tó 21 kilometrar, so hvussu ber til, at ein dystur svarar til eitt hálvmaraton?

- Um hugt verður eftir, hvussu ein spælari flytur seg á vøllinum, skulu teir 14 kilometrarnir faldast við 1,5, og tað gevur 21 kilometrar, greiðir Peter Krustrup frá.

- Tí er væl skilligt, at spælarar brúka tríggjar dagar upp á at koma fyri seg eftir ein HM-dyst, sigur Peter Krustrup.