13 skaldsøgur komnar inn higartil

Fyri 15 mánaðum síðani skrivaðu Sprotin og Bókhandlarafelagið út skaldsøgukapping og á midnátt í kvøld er freistin úti at lata søgur inn til kappingina.

Og higartil eru 13 skaldsøgur komnar inn til kappingina, váttar Kári Árting, formaður í Bókhandlarafelagnum. Tá skipað varð fyri slíkari kapping seinast, fyri trimum árum síðani, komu sjey søgur inn.

Hann sigur, at hann hevði ikki væntað at so nógvar skaldsøgur komu inn. Og tá er ikki óhugsandi, at onkur kemu.r afturat teir seinastu tímarnar.

Seinast var vinningurin 50.000 kr. og hesaferð er hann 100.000 kr. Og Kári Árting útilokar ikki, at økti áhugin kann hava samband við at vinningurin hesaferð er størri.

Í dómsnevndini eru fimm fólk. Tey eru Bergljót av Skarði, Pætur M. Dahl, Eileen Anthoniussen, Jonhard Mikkelsen og Bergur D. Hansen.

Treytirnar eru, at handritið skal vera á føroyskum, og søgan skal vera í minsta lagi 150 síður á 2.000 eindir við millumrúmi.

Ætlanin er at vinnandi skaldsøgan skal verđa kunngjørd á Bókadegnum í Norðurlandahúsinum leygardagin 24. november. Umframt tær 100.000 krónurnar, fær vinnarin eisini útgávusáttmála við Forlagið Sprotan.

Seinast skipað varð fyri skaldsøgukapping vann Marjun Syderbø Kjælnes.