Grovasta mál at sínum slag í Føroyum

Maðurin er skuldsettur fyri at hava meira enn 135-túsund pornografiskar myndir av persónum yngri enn 18 ár, umframt meira enn 2.400 filmsbrot.

Maðurin er eisini skuldsettur fyri at hava sent barnapornografiskar myndir og filmar víðari til onnur. Í fleiri førum er talan um filmar av allar grovasta slag.

Maðurin hevur ikki framleitt tilfar sjálvur, sigur Linda Hesselberg, varafúti.

Avdúkaður í Danmark

Tað er National Cyber Crime Center í Danmark, sum boaði løgregluni í Føroyum frá um málið. Løgreglan gjørdi húsarannsókn heima hjá manninum, og legði m.a. hald á telduna hjá manninum.

Ákæruritið verður nú skrivað, og málið verður latið rættinum seinni í hesum mánaðinum, sigur Linda Hesselberg.

- Hetta er grovasta mál av hesum slagi nakrantíð í Føroyum, sigur Linda Hesselberg, varafúti, við Sosialin.