Skattafrítt at leiga út tak yvir høvdið

Landsstýrið ætlar nú at betra møguleikan hjá fólki at leiga sær bústað.

Landsstýriskvinnan í fíggjarmálum, Kristina Háfoss, hevur sent eitt uppskot til hoyringar um at gera tað skattafrítt at langtíðarútleiga bústaðir.

Í uppskotinum verður mælt til, at leiguinntøka verður skattafrí, tá leigað verður út til bústað í longri tíðarskeið.

Hámarkið er tó 150.000 kr. um árið.

Hámarkið hækkar 

Markið er 50.000 kr. í galdandi lóg.

Broytingin fer at kosta tvær til tríggjar milliónir í skatti um árið, landið missir 55 prosent og kommunurnar 45 prosent.

Uppskotið er eitt av nógvum átøkum í einum bústaðarpakka, sum landsstýrið ætlar at leggja fram í næstum.

Endamálið er at fáa til vegar fleiri bústaðir, nú bústaðartrotið er so stórt.