Viðgera bústaðir

Skulu kommunurnar sleppa at byggja ella útvega bústaðir til at leiga?

Tann spurningin fer Trivnaðarnevndin hjá løgtinginum at viðgera í dag.

Nevndin fer at viðgera uppskotini hjá Sjálvstýri og hjá Sonju Jógvansdóttur, uttanflokkatingkvinnu, um at geva kommununum loyvi til at útvega leigubústaðir.

Trivnaðarnevndin hevur nógvar innkallingar á skránni í sambandi við hetta málið.

Umboð fyri felagsskapin Búgva, smápartafelagið Mark, Kommunufelagið, Lív, Bústaðir, og umboð fyri Tórshavnar, Klaksvíkar og Fuglafjarðar kommunu eru boðin á fund við nevndina at siga sína hugsan um uppskotini hjá Sjálvstýri og Sonju Jógvansdóttur.

Landsstýriskvinnan í fíggjarmálum er eisini boðsend í Trivnaðarnevndina fyrrapartin í dag. 

Annars er løgtingið farið í heystfrí.

Næsti tingfundur er týsdagin 23.oktober, og tá er eisini næsti nevndarfundur. Tá hava limirnir hjá løgtinginum í Norðurlandaráðnum fund.