Fáa samlaðu útreiðslunar í næstu viku

Landsstýriskvinnan í mentamálum hevur verið í løgtinginum og biðið um 18,7 milliónir krónur til meirútreiðslur.  Men tað verður tørvur á fleiri pengum fyri at fáa verkætlanina lidna. 

Fíggjarnevndin hjá løgtinginum hevði fund fríggjadagin, og tá var ætlanin at viðgera eykajáttanina til Glasir. Men tað varð ikki viðgjørt á fundinum, tí nevndin bíðar eftir at greiða fæst á samlaðu meirútreiðslunum. 

Landsverk hevur kunnað landsstýrikvinnuna í mentamálum um, at tað verður neyðugt við meira enn teimum 18,7 milliónunum. 

Rigmor Dam segði í Degi & Viku tann áttanda november, at hon hevur biðið Landsverk um at savna saman allar rokningarnar fyri at fáa greiðu á samlaðu meirútreiðslunum, og tað skuldi gerast innan 14 dagar.  

Politiska ábyrgdin ógreið

Tað er ikki staðfest, hvør hevur politisku ábyrgdina av meirnýtluni í samband við byggingina av skúlanum í Marknagili. Í innliti, sum Kringvarpið hevur fingið, sæst, at Mentamálaráðið beinavegin gjørdi stjóran á Landsverki varugan við, at hann hevur ikki heimild at virka uttanfyri teir játtaðu fíggjarligu karmarnar. 

Í einum telduposti, sum Mentamálaráðið hevur sent Samferðslumálaráðnum, Fíggjarmálaráðnum og Løgmansskrivstovuni tann 23. oktober, stendur eisini millum annað: 

"Vit eru enn einaferð í tí ógreiðu støðuni, har spurningurin er, hvør hevur politisku ábyrgdina."

Landsverk, sum hevur staðið fyri byggingini, er ein stovnur undir Samferðslumálaráðnum.

Men sjálvur skúlin er ein stovnur, sum liggur undir Mentamálaráðnum.