Kann koma fyri at sáttmáli ikki verður hildin

Tað kann koma fyri, at sáttmálar ikki verða hildnir eftir lógini um fyrisiting av sjófeingi, hóast váttað er fyri tí.

Men tað er ikki Vørn, sum skal hava eftirlit við, at sáttmálarnir verða hildnir sambært lógini.

Tað skulu partarnir á arbeiðsmarknaðinum, og síðani kann brotið revsast sambært lógini.

Tað sigur Høgni Hoydal, landsstýrismaður, í svari til Helga Abrahamsen í Sambandsflokkinum.

Hann spurdi, um landsstýrismaðurin kann vátta, at einki fiskiloyvi er latið sambært lógini um fyrisiting av sjófeingi til nakran, ið ikki rindaði skipara og manning løn eftir sáttmálanum við føroysk manningarfeløg.

Skulu løna eftir sáttmálanum

Høgni Hoydal sigur, at tað samsvarar ikki við lógina, um lønt ikki verður eftir sáttmálum við manningarfeløgini.

Vørn skrivar fiskiloyvi út, og skal útvega váttanir um, at skipari og manning verða lønt eftir sáttmála við manningarfeløgini.

Eru váttanirnar heintaðar inn, hevur Vørn gjørt sína uppgávu.

Verða brot staðfest á lógina, er tað uppgávan hjá myndugleikanum at revsa hetta samsvarandi brotinum, sigur Høgni Hoydal í svarinum til Helga Abrahamsen.