Tríggir minnilutar um rúsdrekka í Vinnunevndini

Vinnunevndin hjá løgtinginum er í trimum minnilutum í álitinum um uppskotið hjá Magna Laksafoss um at loyva bryggjaríunum at selja sína egnu vøru, tað er eisini sterkasta ølið, cider og brennivín.

Jákup Mikkelsen, Helgi Abrahamsen og Bárður Kass Nielsen mæla frá at samtykkja uppskotið, tí tað fer at økja munandi atkomuna at rúsdrekka. 

Bjørt Samuelsen, Bjarni Hammer og Ingolf S. Olsen vilja broyta uppskotið, so tað verður broytt til bara at umfata øl og cider, sama hvør styrkin er. 

Janus Rein sigur, at hann tekur støðu í tingsalinum. Tað verður so í dag, tí tingið skal atkvøða um uppskotið á fundinum í dag.

Sambært galdandi lóg hava bryggjaríini loyvi til at selja øl upp til 5,8 prosent.