Eingi stykki til vinnuna at byggja á

Havnini vantar øki til vinnuna at byggja á.

Í løtuni hevur kommunan eingi vinnustykki á sølulista. 

Øll stykkini á Skarðshjalla eru seld ella umbiðin, tó við undantaki av stykkjunum, sum verða brúkt til go-kart virksemi. 

Umframt at áhugin fyri vinnustykkjum á Skarðshjalla er stórur, hevur kommunan í løtuni ítøkiligar fyrispurningar frá trimum áhugaðum keyparum. 

Tórshavnar kommuna kannar tí møguleikarnar fyri at útvega lendi til fleiri stykki.

Málið var fyri á býráðsfundi hóskvøldið. 

Ítøkiligar ætlanir

Har samtykti býráðið, at umsitingin hjá kommununi kannar møguleikarnar at keypa lendi til at víðka um vinnuøkið í Vika, arbeiða víðari við framtíðar vinnuútstykkingum á Ovara Hjalla og gera ítøkiligar ætlanir um hesi økini.

Kommunan hevur arbeitt við einari vinnuútstykking á Velbastaðvegnum, men hevur einki lendið tøkt har.

Samráðingar hava verið um keyp við tey, sum eiga lendið, men einki er komið burtur úr. 

Onkrir eigarar vilja ikki selja fyri tað, sum kommunan sigur er nøktandi prísur. 

Kommunan hevur eisini arbeitt við eini verkætlan Á Ovara Hjalla, sum millum annað umfataði eina brennistøð fyri alt landið.

Glyvurnes er eisini nevnt. 

Men har er ætlanin at gera ein ítróttar- og mentanardepil, sum ferðavinnan eisini gerst partur í.