- Tíðindi, mentan og ítróttur
Fýra minnilutar og broytingaruppskot um Postverkið
![](https://kvf.fo/sites/default/files/styles/grein-ovasta-mynd/public/posta_0.png?itok=L7OSK4-x)
Fýra minnilutar og broytingaruppskot komu úr Vinnunevndini, tá hon skrivaði álit um uppskotið hjá Poul Michelsen, landsstýrismanni, um at einskilja P/F Postverk Føroya.
Landsstýrismaðurin ætlar at selja partabrøvini hjá landinum í Postverkinum.
Bjørt Samuelsen, Bjarni Hammer og Ingolf S. Olsen hava eitt broytingaruppskot um veitingarskylduna hjá Posta. Hon skal vera í minst tíggju ár eftir søluna og ikki bara í tíggju ár, sum uppskotið sigur.
Annars hava tey nógvar viðmerkingar um uppskotið hjá landsstýrismanninum. Samgongufólkini í Vinnunevndini gera vart við, at nógvar treytir eiga at verða loknar, áðrenn einskiljingin verður framd.
Millum annað skal landið framvegis gera av, hvørjar myndir vera á frímerkjunum.
Eisini útlendskir pengar
Jákup Mikkelsen og Jørgen Niclasen taka undir við at einskilja P/f Posta, tó at ætlanir landsstýrismansins um sølutilgongd tykjast vera ov avmarkandi.
Fólkafloksmenninir halda, at eisini feløg, sum hava útlendskan kaipital, eiga at sleppa at keypa Postverkið.
Uppskotið sigur, at bara føroyskir keyparar sleppa at bjóða.
Posta hevur sjey kappingarneytar. Útlendskir pengar eru partvíst ella heilt í seks teirra, siga Jákup Mikkelsen og Jørgen Niclasen.
Onnur viðgerð avgerandi
Bjørn Kalsø sigur, at hann tekur støðu í tingsalinum. Onnur viðgerð og atkvøðugreiðsla verða mánadagin.
Bjørn Kalsø sigur, at onnur viðgerð verður avgerandi fyri, um hann tekur undir við uppskotinum hjá Poul Michelsen ella ikki.
Tann einasti í Vinnunevndini, sum bart út sigur, at hann ikki vil einskilja Postverkið, er Kári P. Højgaard.