Amerikanari til KÍ

KÍ hevur styrkt hópin við 19 ára gamla Darius Lewis úr USA.

Spælarin skrivar sjálvur á Instragram, at hann hevur vant nógv, og at hann nú gleðir seg til at byrja yrkisleið sína í fótbólti.

Darius Lewis skrivar eisini, at hetta er hansara fyrsti fulltíðarsáttmáli.

Heimasíðan hjá Philadelphia Union Academy, sum Darius Lewis hevur umboðað, skrivar, at hann skoraði 21 mál í teimum trimum árunum, har hann umboðaði tey í U17 og U19 fótbólti.

KÍ hópurin telur nú seks útlendingar, sum koma úr Japan, USA, Serbia, Noregi, Danmark og Makedonia.

Broyttur KÍ-hópur

KÍ hópurin er munandi broyttur samanborið við í fjør. Felagið hevur fingið fimm nýggjar spælarar í hópin, og fimm eru farnir úr hópinum.

Teir nýggju í hópinum eru Torbjørn Grytten, Patrik Johannesen, Takuya Matsunaga, Darius Lewis og Jesper Brinck.

Fimm spælarar eru farnir úr felagnum: Semir Hadzebulic, Páll Klettskarð, Hørður Askham, Ronni Møller-Iversen og Predrag Pocuca

Betrideildin 2019 byrjar 10.mars. KÍ spælir í fyrsta umfari á heimavølli ímóti HB