Hópuppsagnir í Tesla

Fyritøkan Tesla, sum ger elektriskar bilar, fer at siga umleið 3.000 starvsfólk upp. Hópuppsagnirnar koma, sambært bretska kringvarpinum, í kjalarvørinum av torførasta árinum hjá fyritøkuni higartil.

BBC skrivar, at Elon Musk sendi starvsfólkunum ein teldupost fríggjadagin, har hann boðaði frá torføru støðuni hjá fyritøkuni.

- Hóast vøksturin er góður, er tað torført at gera Tesla-bilar eins bíligar og bilar, ið brúka brennievni, skrivar stovnarin, Elon Musk, í teldubrævinum.

Fleiri enn 45.000 fólk arbeiða hjá Tesla, og umleið 3.000 teirra verða søgd úr starvi komandi tíðina. Tað svarar til 7 %. 

Tá virðisbrævamarknaðurin opnaði í Amerika fríggjadagin, varð virðið á partabrøvum hjá Tesla lækkað við seks prosentum. 

Hóast hetta, var 2018 samstundis tað mest væleydnaða árið hjá Tesla higartil, og fleiri bilar vórðu framleiddir í fjør enn tað vórðu øll ár frammanundan til samans.  

Trupulleikin tykist tó vera prísurin av Tesla-bilunum, sum sambært stovnarinum eru ov dýrir fyri flest fólk, og vinningurin er tí av somu orsøk ov lítil. 

Framhaldandi fer Tesla at arbeiða við at framleiða ymsar útgávur av el-bilum fyri ein bíligari penga.