Atkvøða í løgtinginum um netið hjá SEV

Løgtingið fer í dag at atkvøða um netið hjá SEV.

Undirtøka er fyri einum uppskoti til samtyktar hjá Sambandsflokkinum um at skilja netið hjá SEV frá øðrum virksemi hjá SEV, so netið verður ein sjálvstøðug eind.

Vinnunevndin hjá løgtinginum er samd um eitt broytingaruppskot, har løgtingið heitir á landsstýrið um at gera eina frágreiðing um, hvussu netið hjá SEV kann verða skilt frá hinum virkisøkinum hjá SEV, so fult gjøgnumskygni verður í, hvussu nógv netið kostar. 

Løgtingið skal eisini heita á landsstýrið um at samskipa hesa frágreiðing við arbeiðið, sum landsstýrið ger fyri at fáa sett nógv meira ferð á grønu orkuna.

Landsstýrið eigur eisini, sambært Vinnunevndina, at síggja til, at størri kapping verður um at gera og selja grøna orku.

Vinnunevndin minnir á, at Føroyar í 2030 eiga at verða riknar við varandi orku, grønari orku, burturav.

Nógv meira ferð

Nevndin sigur, at skulu vit røkka málinum í 2030, skal nógv meira ferð setast á at gera varandi orku.

Framleiðslan av grønari streymorku skal fleirfaldast, og her er brúk fyri, at øll lyfta í felag, land, kommunur, privatar fyritøkur og einstaklingar, sigur Vinnunevndin. 

Hon sigur, at vit eru nærum í einari monopolstøðu, har SEV er nógv tann størsti framleiðarin.

Og bara tvey oljufeløg eru í Føroyum, eitt duopol. Olja verður brúkt til at gera okkurt um 90 prosent av orkuni í Føroyum. Tá eru skipini tald við.

Vinnunevndin mælir til, at vit í Føroyum fáa eina, sum nevndin sigur, sunnari og effektivari kapping um orkuna.