Hybridbilar grønari enn elbilar sigur andstøðan

Landsstýriskvinnan í fíggjarmálum eigur tí at koma í løgtingið við einum lógaruppskoti, sum gevur hybridbilum sama avgjaldslætta sum elbilar fáa.

Tað heldur meirilutin í Fíggjarnevndini, sum er andstøðan.

Nevndin er annars samd um at sleppa elbilum og vetnisbilum undan virðisgjaldi næsta ár eisini. 

Meirilutin í Fíggjarnevndini sigur, at elbilar brúka streym frá SEV. Og SEV brúkar framvegis olju til at gera streym.

Hybridbilar gera sjálvir orku, meðan teir koyra, og hava tí ikki brúk fyri SEV. 

Ein hybridbilur brúkar bensin ella diesel og tann streymin, sum hann sjálvur ger, meðan hann koyrir.

Ikki grøn orka

Andstøðan í Fíggjarnevndini sigur, at so leingi SEV ikki ger grønari orku, eru hybridbilar grønari enn elbilar.

Hybridbilar eiga tí at fáa sama avgjaldslætta sum elbilar, sigur andstøðan.

Løgtingið fer í morgin at atkvøða um uppskotið hjá Kristinu Háfoss, landsstýriskvinnu, um at sleppa elbilum og vetnisbilum undan virðisgjaldi í 2020 eisini. 

Í februar vóru 126 elbilar í Føroyum.

Tá avgjaldslættin kom í 2008, var eingin el-bilur í Føroyum.

BankNordik gevur teimum, sum keypa elbil, biligari lán enn vanlig billán.

Og bankin fer at seta upp løðingarstøðir við deildirnar, sigur hann í tíðindaskrivi.