Føroya Tele letur landinum 35 milliónir krónur

Úrslitið hjá Føroya Tele í fjør var 48 milliónir krónur eftir skatt.

Eigarin, sum er Føroya Landsstýri, fær 35 milliónir krónur av avlopinum í vinningsbýti.

Tað boðar Føroya Tele frá í skrivi.

Felagið hevði ársaðalfund í gjár.

Tekur fleiri ár at útbyggja fipurnetið

Stóra verkætlanin hjá dótturfelagnum NET at breiða fipur út í øllum landinum hevur myndað ein part av virkseminum hjá Føroya Tele í fjør.

Fyrstu kundarnir hava longu fingið fipurbreiðband, men mett verður, at ein landsumfatandi útbygging fer at taka millum 5 og 7 ár, skrivar Føroya Tele.

Í fjør valdi Føroya Tele eisini at selja eina góða helvt av ognarlutinum í Formula.

Um orsøkina at selja burturav sigur felagið, at tað í størri mun ætlar at miðsavna seg um kjarnuvirksemið.

Føroya Tele eigur framvegis ein triðing í Formula.