Sjóborg umvæld og fer aftur í vinnu í morgin

Veitingarskipið Sjóborg fer aftur í vinnu í morgin. Sjóborg bar fyri trimum vikum síðani við oljuboripallin Statfjord A í Norðsjónum.

276 fólk vóru á Statfjord A, sum oljufelagið Equinor, gamla Statoil, eigur. Fólkini vórðu flutt av pallinum, men tey vórðu flutt um borð aftur tveir dagar seinni.

Kanning liðug í september

Sjóborg arbeiddi fyri Statfjord A og var í ferð við at geva pallinum vatn, tá óhappið hendi. Sjóborg hevur sáttmála við Equinor til 2022, og skipið heldur fram at arbeiða eftir tí sáttmálanum, nú tað er umvælt.

Sambært sáttmálanum rindar Skansi Offshore fyri at umvæla Sjóborg, og Equinor fyri at umvæla oljupallin, sigur Jens Meinhard Ramussen, stjóri í Skansanum Offshore.

Ein kanning verður gjørd um óhappið, men hon verður ikki liðug fyrr enn í september. Skansi Offshore eigur Sjóborg, sum nú liggur í Stavanger.