Kvotur heldur enn fiskidagar

Tað sigur felagið í hoyringarskrivinum um nýggju fiskivinnulógina. Umsetiligheitin er lættari í kvotuskipan, sigur Arbeiðsgevarafelagið.

Felagið ásannar, at vandin fyri útblaking er størri, tá skipini hava kvotur, men trupulleikin kann loysast við herdari revsing og betri eftirliti. 

Blandingsfiskiskapur ein trupulleiki

Ein annar trupulleiki er blandingsfiskiskapur, til dømis, tá skip, sum royna eftir toski, eisini fáa hýsu.

Men hann kann loysast við at geva møguleika fyri at keypa og selja kvotur til ymisku fiskasløgini millum sín, umframt at hava reglur, sum undir ávísum treytum gera tað møguligt at taka veiðu frá blandingsfiskiskapi við til lands, hóast farið verður eitt sindur upp um kvotuna.

Arbeiðsgevarafelagið sigur, at sama um Fiskimálaráðið velur kvotuskipan ella fiskidagaskipan er sera umráðandi at hava  umsetilig rættindi fyri at styrkja effektivitetin í skipanini.