Coronavirus staðfest í Týsklandi

Ein 33 ára gamal maður í Týsklandi hevur fingið staðfest coronavirus, hóast hann ikki hevur verið uttanlands.

Týska tíðindastovan skrivar, at maðurin var smittaður av einum kinesiskum starvsfelaga, sum kom á vitjan í Týsklandi.

Tí verður staðfest, at hetta er fyrsti tilburðurin, at virusið hevur smittað millum fólk uttan fyri Asia, skrivar týska tíðindastovan, DPA.

Kinesisk kvinna smittuberi

Týsku heilsumyndugleikarnir upplýsa, at talan var um eina kinesiska kvinnu, sum vitjaði á skrivstovuni, har maðurin arbeiðir í Týsklandi.

Maðurin er avbyrgdur, og hann livir væl, siga myndugleikarnir.

Heilsumálaráðharrin í landspartinum Bayern, Melanie Huml, sigur, at myndugleikarnir taka málið í størsta álvara.

Er eisini vorðin sjúk

Der Spiegel skrivar, at kvinnan hitti foreldrini, sum búgva í Wuhan, áðrenn hon fór til Týsklands. Tá hon kom heimaftur, gjørdist hon sjúk.

Eisini japansku myndugleikarnir boða frá, at ein maður er sjúkur, hóast hann ikki hevur verið í Wuhan.

Maðurin koyrir buss, og skal hava verið saman við kinesiskum ferðafólkum, skrivar Reuters.