Fíggjarnevndin tekur undir við grannskoðarunum

Fíggjarnevndin hjá løgtinginum tekur undir við viðmerkingunum hjá løgtingsgrannskoðarunum um landsroknskapin fyri 2018.

Nógv viðurskifti eru ikki í lagi í almennu fyrisitingini.

Landsroknskapurin er ikki fullfíggjaður, siga løgtingsgrannskoðararnir og Fíggjarnevndin.

Fíggjarnevndin tosaði við øll í landsstýrinum uttan Jacob Vestergaard, tá hon viðgjørdi uppskotið hjá løgtingsgrannskoðarunum um at samtykkja landsroknskapin fyri 2018 við viðmerkingunum, sum eru um at fáa viðurskifti í rættlag.

Nøkur afturvendandi viðurskifti, sum løgtingsgrannskoðararnir hava víst á, eru komin í rættlag, sigur Fíggjarnevndin í álitinum.

Nógv at fáa í rættlag

Men nógv er eftir at fáa í rættlag, og Fíggjarnevndin sigur, at løgmaður eigur at seta landsstýrisfólkunum tíðarfreistir fyri, nær hesi viðurskifti skulu fáast í rættlag.

Nøkur viðuskifti átala løgtingsgrannskoðararnir harðliga, og Fíggjarnevndin tekur undir við hesum átalum.

Fíggjarnevndin mælir løgtinginum til at samtykkja uppskotið hjá løgtingsgrannskoðarunum.

Fíggjarnevndin hevur fund seinnapartin í dag, og fer tá millum annað aftur at viðgera útbyggingina á Landssjúkrahúsinum.