Løgmaður: Føroyingar skulu ikki hava herskyldu

Fyri tað, um ein flokkur í Danmark kemur við uppskoti um herskyldu í Føroyum, er ikki sagt, at herskyldan kemur, als ikki.

Føroyingar hava ongantíð verið undir danskari herskyldu, og tað fara teir heldur ikki at vera í framtíðini. 

Tað segði Bárður á Steig Nielsen, løgmaður, í løgtinginum í gjár.

Hann fekk munnligan fyrispurning frá Høgna Hoydal, løgtingsmanni.

Danski fólkaflokkurin legði herfyri uppskot fram á fólkatingi um, at bæði føroyingar og grønlendingar skulu hava herskyldu. Eitt líknandi uppskot frá Danska fólkaflokkinum fall í fólkatinginum í 2016.

Samgongan hevur sett sær fyri, at føroyskir myndugleikar skulu tryggja sær størri innlit í og ávirkan á øll uttanríkispolitisk mál, trygdarpolitisk mál og verjupolitisk mál, sum hava týdning fyri Føroyar, segði løgmaður eisini.