Umrøða fíggjarleistin í ES

Hesa vikuna fara ES-londini at umrøða fíggjarleistin hjá samveldinum í framtíðini, eftir at bretar eru farnir burturúr.

Tað setur stór krøv til hini londini, um búskaparliga gongdin í ES skal vera tann sama, sum hon hevur verið seinastu árini, tí Bretland var eitt av londunum, sum rindaði mest til samstarvið í ES.

Enn eru londini í ES ikki samd um, hvussu bretski parturin skal fíggjast. Tað kann gerast við at hava lægri fíggjarætlan, ella at londini rinda meir til samveldið.

Seinast, ES londini samdust um eina fíggjarætlan fyri sjey ár, var í 2013. Tá stóð táverandi bretski forsætisráðharrin fyri bretsku samráðingunum, og hann mælti til at fara undir at spara.

Trýst á danska forsætisráðharran

Nú eru bretar ikki við, og tí mugu londini, sum vilja spara, sjálvi at taka sær av samráðingunum, og tað leggur stórt trýst á danska forsætisráðharran, Mette Frederiksen.

Hon hevur longu boðað frá, at Danmark er farið saman við Svøríki, Hollandi og Eysturríki um at fáa ES at fara undir at spara. Londini hava mælt til, at útreiðslurnar skulu ikki hækka meir enn eitt prosentstig av bruttotjóðarúrtøkuni. Tað er væl minni enn tað, sum onnur ES lond tosa um.

Onnur lond vilja hava, at fíggjarætlanin ikki hækkar, nú bretar fara burturúr, og tað eru alt viðurskifti, sum ES-londini fara at umrøða í hesi vikuni, skrivar Politiken.