Arbeiðsloysisstuðulin hækkar

Hækkaður arbeiðsloysisstuðul er millum tey 19 tingmálini, sum landsstýrið týsdagin samtykti at lata løgtinginum.

Við í uppskotinum er eisini eftirløn av arbeiðsloysisstuðlinum. 

Skotið hevur verið upp at hækka arbeiðsloysisstuðulin úr 75 prosentum upp í 80 prosent av útrokningargrundarlagnum, og at hækka mesta arbeiðsloysisstuðulin 1.000 krónur - upp í 18.500 krónur um mánaðin.

Lóg um doping

Eitt annað uppskot, sum varð avgreitt á landsstýrisfundinum týsdagin, er uppskot um lóg um doping og óreiðiliga ávirkan í ítrótti.

Seinasta freist at lata løgtinginum uppskot, sum skulu viðgerast í hesari tingsetuni, er í morgin.

Seinasti framløgudagur er fríggjadagin 6.mars.

Bárður á Steig Nielsen, løgmaður, segði við Útvarpið í gjár, at samgongan hevur 30 uppskot at leggja fram.