- Tíðindi, mentan og ítróttur
Malariaheilivágur móti Covid-19
![](https://kvf.fo/sites/default/files/styles/grein-ovasta-mynd/public/coronavirus_h.png?itok=g-Si11HE)
Í fleiri londum eru læknar nú farnir at nýta malariaheilivág til at viðgera korona-sjúklingar, og okkurt bendir á, at tað riggar, skrivar Berlingske.
Talan er um heilivágin, klorokin.
Franska blaðið La Provence, skrivar, at ein lækni úr Marseille hevur gjørt kliniskar royndir við 24 sjúklingum, sum hava fingið klorokin móti Covid-19.
Eftir viðgerð í átta dagar vóru tríggir fjórðingar av sjúklingunum frískir. Virusið er annars í kroppinum í 20 dagar, skrivar Berlingske.
Gongdin hjá sjúklingunum er sammett við gongdina hjá sjúklingum í sjúkrahúsum í Nice og Avignon, har tey ikki hava nýtt sama heilivágin. Har eru 90 prosent av teimum framvegis sjúk, skrivar La Provance.
Í Póllandi eru tey eisini farin at nýta sama malariaheilivág, skrivar TVN24. Har verður heilivágurin nýttur móti sjúkueyðkennunum.
Ongin koppseting enn á sinni
Kring heimin arbeiða læknar og granskarar við at finna eina koppseting móti Covid-19, sum hevur rakt smá 200-túsund fólk kring heimin.
Flestu serfrøðingarnir meta kortini, at ein góðkend, hópframleidd koppseting ikki verður klár fyrrenn um eitt ár.
Tí hevur tað stóran týdning at finna heilivág, sum longu er tryggur, sum kann viðgerða og kanska enntá lekja fólk, sum hava Covid-19.
Í Avstralia, Svøríki og Kina, eru royndir eisini gjørdar við malariaheiliváginum, men eisini HIV-heilivági og øðrum heilivági.
Heimsheilsustovnurin, WHO, hevur í fleiri ár ávarað ímóti at brúka klorokin móti malaria í fleiri afrikanskum londum, tí malariumíggjabitin útviklaði mótstøðuføri móti heilivágnum.
Sambært AFP skal ein ikki keypa heilivágin uttan resept, og Berlingske leggur áherðslu á, at malariaheilivágurin ikki er váttaður sum ein álítandi viðgerð.