Novo Nordisk: Føroyingar kunnu eisini søkja

Føroyingar eru vælkomnir at søkja um at fáa burtur av teimum 50 milliónum krónunum, sum Novo Nordisk-grunnurin hevur sett av til at basa korona-farsóttini.

Tað boðar grunnurin fyri donska heilivágsfyritøkuna frá.

Pengarnir skulu nýtast til verkætlanir, ið hava til endamáls at byrgja upp fyri skaðiligum avleiðingum á heilsuøkinum, orsakað av korona-farsóttini.

Søkjast kann um stuðul innan trý øki.

Tað kunnu vera vísindaligar verkætlanir, ið royna nýggjar viðgerðir, tøkni ella fyribyrgjandi átøk, og upplýsandi tiltøk, sum kunnu bøta um samskiftið við borgaran.

Triðja økið er sosial tiltøk, ið taka atlit at serliga heilsuliga tørvinum hjá teimum, sum eru í serligum smittuvanda.

Treytin fyri at søkja er millum annað, at arbeiðið við verkætlanunum er klárt at fara í gongd beinanvegin, sigur Novo Nordisk-grunnurin.