Fáa 12 milliónir úr landskassanum

Atlantic Airways fer at fáa 12 milliónir krónur úr landskassanum, tá nýggja afturberingarskipanin, sum landsstýrið hevur lagt fyri løgtingið, er farin at virka.

Og hon skal virka frá tí degi, hon varð løgd fram. Tað var leygardagin. Men fyrsta viðgerð hevur ikki verið enn. Tingfólk, serliga tey í andstøðuni, vilja hava góðar stundir til at viðgera hetta uppskotið.

Uppskotið er, at flogfeløg, sum eru skrásett í Føroyum, fáa 35 prosent aftur av lønunum, sum flogskiparar, stýrimenn og flogternur í flogførum og tyrlum, fáa.

Landið ber allan kostnaðin

Fíggjarmálráðið roknar við, at hesi fólk fáa 35 milliónir krónur í lønum og rinda 14 milliónir í skatti. Landið hevur tí tvær milliónir krónur eftir av skattinum.

Kommunurnar missa tó einki, tí landið ber allan kostnaðin. Fíggjarmálaráðið sigur, at uppskotið er ikki nýtt, tí sambært samgonguskjalinum skal FAS-líknandi skipan fyri flogfeløg kannast. 

Skipanin, sum nú kemur, er bæði fyri føroysk og útlendsk feløg, sum eru fult skattskyldug í Føroyum. Norðurlendsk flogfeløg eru skrásett í lágskattalondum, serliga í Írlandi.