Jupiter verður seldur til Northwest Pelagic

Varðin í Gøtu og Northwest Pelagic í Kollafirði leggja í hesum døgum síðstu hond avtalu um, at Northwest Pelagic skal keypa uppsjóvarskipið Jupiter frá Varðanum

Tað váttar Jákup Jacobsen, stjóri í Varðanum, fyri Kringvarpinum. 

Sambært stjóranum verður sølan væntandi endalig mánadagin, men enn eru ymisk viðurskifti, ið skulu avgreiðast, m.a. søluprísur, og nær skipið verður latið nýggja eigaranum. 

Tróndur aftur í vinnu

Jupiter verður seldur, tí Tróndur í Gøtu er um at verða liðugt umvældur, eftir at gearið á skipinum fór fyri níggju mánaðum síðan. 

Varðin leigaði í fyrstu atløgu Gitte Henning at fiska kvoturnar hjá Tróndi í Gøtu. Reiðaríið avgjørdi at keypa Gitte Henning í august í fjør.

Men nú Tróndur í Gøtu fer aftur í vinnu, hevur felagið eitt skip til avlops,  og tí verður Jupiter seldur. Loyvið hjá Jupiter verður flutt á eitt av hinum skipunum hjá Varðanum.

Norðhavið verður selt

Northwest Pelagic í Kollafirði eigur frammanundan Norðhavið, ið er gamla Atlantsfarið.

Jógvan M. Ferjá, stjóri í Nortwest Pelagic, sigur við heimasíðuna JN.fo, at ætlanin er at selja Norðhavið í Afrika, har tað er til fiskiskap. 

Umframt Trónd í Gøtu, Gitte Henning 1 og Jupiter, eigur Varðin eisini uppsjóvarskipini Finn Fríða og Tummas T.