Klakkur fiskar kvotuna á Flemish Cap

Aftur í ár skal frystilínuskipið Klakkur fiska toskin, sum Føroyar hava fingið á Flemish Cap fyri rossamakrel í Suðurkyrrahavinum.

Klakkur skal fiska fyri partafelagið Thor Fisheries, sum eigur toskin, tí Thor hevði rætt til at fiska uppsjóvarfisk í Suðurkyrrahavinum.

Føroyar hava í ár fingið 355 tons av toski á Flemish Cap, sum er í NAFO-økinum.

Toskurin er fyri rossamakrelin, sum Føroyar hava í Suðurkyrrahavinum.

Býtishandil við ES

Føroyar fiska ikki longur í Suðurkyrrahavinum, og tí hava Føroyar fingið tosk á Flemish Cap í einum býtishandli við ES.

NAFO-økið er altjóða sjógvur sunnan fyri Grønland og eystan fyri Kanada.

Í fjør summar brúkti Klakkur tríggjar vikur til at fiska tey 450 tonsini av toski, sum føroyingar tá fingu frá ES á Flemish Kap.