Miðlar: Slovakiskur spælari fingið koronu

Ein leikari hjá slovakiska meistarafelagnum, Slovan Bratislava, hevur fingið koronu.

Tað skriva fleiri føroyskir miðlar, teirra millum Norðlýsið, in.fo og portal.fo, sum endurgeva slovakiskar miðlar fyri søguna. 

Eftir ætlan skulu Slovan Bratislava møta KÍ í fyrsta undanumfarinum til Champions League mikukvøldið. Dysturin verður spældur í Klaksvík.

Hevur einki frætt

Tummas Lervig, formaður í KÍ, upplýsir fyri Kringvarpinum, at hann hevur einki frætt frá mótstøðuliðnum ella myndugleikunum um, at ein leikari hjá slovakiska liðnum hevur fingið staðfest koronu.

Men hann vísir á, at spælararnir verða kannaðir fyri koronu, tá ið teir koma til landið, og Tummas Lerveg væntar ikki at frætta nakað, fyrr enn úrslitið av kanningunum er greitt.