Hoyvík aftur undir føroyskt flagg

Uppsjóvarskipið Hoyvík kemur nú aftur undir føroyskt flagg. 

P/f Thor Fisheries í Hoyvík hevur keypt uppsjóvarskipið aftur úr Grønlandi, eftir at sama reiðarí seldi tað til Pelagic Greenland í farna mánaði. 

Keypsprísurin er júst tann sami sum søluprísurin, 22 milliónir krónur. 

Hans Jacob Kelduberg, reiðari í Thor, upplýsir, at ætlanin altíð var at keypa skipið aftur, og at talan veruliga var um eitt lán.

Men grønlendska lóggávan loyvir ikki einum skipi at sigla undir tveimum fløggum, og tí var eitt lán ikki møguligt, sigur Hans Jacob Kelduberg.

Hann upplýsir, at grønlendskir myndugleikar hava verið kunnaðir um avtaluna.