3.000 færri viðgerðir og kanningar í ár

Ambulantar kanningar og viðgerðir eru stívliga 3.000 færri higartil í ár, enn tær vóru somu tíð í fjør.

Tað sigur Kaj Leo Holm Johannesen, landsstýrismaður, í svari til Sirið Stenberg, løgtingskvinnu, sum spurdi um bíðilistarnar hjá sjúkrahúsunum.

Landsstýrismaðurin sigur, at serliga í ortopediini, á skurðdeildunum, og í fysio- og ergoterapiini eru avbjóðingar á øllum trimum sjúkrahúsunum. 

Harafturat eru bíðilistarnir í pørtum av psykiatriini framvegis longri enn, áðrenn koronusmittan kom til Føroya.

Telefonsamrøður við sjúklingar gera tó, at minkingin ikki er størri enn hon er.

Korona var steinur oman á byrðu á skurðdeildunum, har sum læknatrot og fleiri ávísingar vóru frammanundan.

Kaj Leo Holm Johannesen sigur, at sambært einari meting, sum Landssjúkrahúsið gjørdi saman við Búskaparráðnum, kostar korona 16 mió. kr.