Greining: Biden favorittur at vinna forsetavalið

Forsetavalið í USA er í dag. Sambært U.S. Elections Project, hava 98 milliónir amerikanarar longu greitt atkvøðu, av teimum umleið 240 milliónunum, sum hava valrætt til valið í dag.

Sambært heimasíðuni FiveThirtyEight, sum greinar veljarakanningar, vísa hagtølini, at Biden er favorittur at vinna, og at Trump bara hevur 10 prosent møguleika fyri at endurvinna forsetasessin. 

Ábendingar um eitt tætt val

FiveThirtyEight leggur kortini dent á, at tað bara eru fáir marginalar, ið skulu broytast fyri hendan myndin broytist heilt nógv, og at tað verður nógv tættari enn síðstu veljarakanningarnar benda á.

Víst verður á, at í 2016 vístu veljarakanningarnar at Hillary Clinton fór at vinna, men hetta hendi sum kunnugt ikki. Harafturímóti vísa veljarakanningarnar, at Biden stendur seg sterkari enn Hillary Clinton í øllum svingstatunum, sum ikki hava siðvenju at velja sama flokk. 

Valevnini bæði, Donald Trump og Joe Biden, endaðu báðir teirra valstríð í tveimum av svingstatunum í nátt okkara tíð. Donald Trump Michigan og Joe Biden í Pennsylvania.