Atkvøða um Barsilsskipanina og ALS í dag

Níggju atkvøðugreiðslur eru í skránni fyri tingfundin seinnapartin í dag.

Millum annað skal tingið atkvøða um at hækka inngjaldið í Barsilsskipanina úr 0,71 prosentum upp í 0,86 prosent og heilsutrygdargjaldið úr 0,60 prosentum upp í 0,70 prosent.

Løgtingið skal eisini atkvøða um broytingar í ALS. 

Uppskotið er, at arbeiðsloysisstuðulin hækkar 1.000 krónur um mánaðin, upp í 18.500 krónur.

Útrokningargrundarlagið hækkar úr 70 prosentum upp í 80 prosent. Og nú skal eftirløn gjaldast av pengunum, fólk fáa frá ALS.

Broytingin ger, at arbeiðsloysisstuðulin í mesta lagi kann vera 222.000 krónur um árið umframt eftirlønargjaldið.  

Inngjaldið til ALS lækkar úr 1,25 prosentum niður í eitt prosent.