ES góðtekur neyðuga ferðing til Bretlands

ES-nevndin mælir nú limalondunum til at loyva farmaflutningi og neyðugari ferðing til Bretlands.

Hetta hevur nevndin avgjørt í dag, eftir at flestu lond í Evropa og onnur við hava steðgað allari samferðslu til Bretlands, nú ein nýggj mutation av Covid-19 er staðfest í Bretlandi, sum smittar sera illa.

Nógv ferðafólk er fangað í Bretlandi og sleppa ikki heim, og haraftrat sleppa túsundtals vørubilar ikki til Bretlands og úr Bretlandi.

Reuters skrivar, at ES-nevndin nú mælir til at fáa gongd á vøruflutningin aftur, men framvegis verður mælt frá allari óneyðugari ferðing til Bretlands.

Samstundis mælir ES-nevndin limalondunum til, at fólk, sum koma úr Bretlandi, skulu kannast fyri koronu og í 10 daga sóttarhald.  Lastbilførarar og heilsustarvsfólk eru undantikin.