Yvirfriðingarnevnd: Lívfiskastøð skemmar umhvørvið

Lívfiskastøðin, sum Bakkafrost ætlar at byggja fyri 200 milliónir krónur í Skálavík, er ov skemmandi fyri umhvørvið, og tí skal hon broytast. 

Tað sigur Yvirfriðingarnevndin. Økið, har Bakkafrost fer at byggja lívfiskastøðina, er í grundini friðað. Tað krevur tí undantaksloyvi at sleppa at byggja har.

Tað er Yvirfriðingarnevndin sum útgangsstøði sinnað at lata. Men tað krevur, at verkætlanin verður broytt, sigur Henrik Møller, formaður í Yvirfriðingarnevndini, við útvarpið.

Stjórin vónar, ein loysn verður funnin skjótt

Bakkafrost hevur skrivað undir sáttmála við J&K Petersen um arbeiðið at grava út og fylla út fyri nýggju lívfiskastøðini í Skálavík.

Nýggja lívfiskastøðin fer eftir ætlan at veita rogn til alt virksemið hjá Bakkafrosti í Føroyum, og part av virkseminum í Skotlandi.

Regin Jacobsen, stjóri í Bakkafrosti, sigur í stuttari viðmerking, at samskifti er millum Bakkafrost og Yvirfriðingarnevndina um at finna eina nøktandi loysn, sum yvirfriðingarnevndin kann góðkenna. 

Stjórin í Bakkafrosti hevur ikki aðrar viðmerkingar, meðan málið verður viðgjørt, men hann vónar at finna eina loysn skjótt, tí málið hevur longu seinkað byggingini av lívfiskastøðini í Skálavík.