Meirilutin vil hava málsøkjabýtið broytt

Nýggi meirilutin í Tórshavnar býráð skjýtur upp at broyta málsøkjabýtið í nevndunum, og at eldranevndin broytir navn til heilsu- og eldranevndin.

Málið kemur til viðgerðar á býráðsfundi í morgin.

Javnaðarflokkurin og Sambandsflokkurin skjóta upp at flyta skúlaøkið frá mentamálanevndini til trivnaðarnevndina. Meirilutin sigur, at við hesi broyting verður javnari arbeiðsbýti millum báðar nevndinar.

Mælt verður til at broyta heitið á eldranevndini til heilsu- og eldranevndin, tí nevndin og fyrisitingin varða av øllum borgarum, ikki bara teimum eldru.

Nevndin varðar av heimasjúkrasystrunum, sum veita øllum borgarum í kommununi tænastu, og heimarøktini. Haraftrat hevur kommunan skyldu til at veita borgarum undir 67 ár ávísar tænastur.

Javnaðarflokkurin og Sambandsflokkurin skjóta eisini upp, at vinnunevndin skal vera nýggj nevnd undir fíggjarnevndini, í staðin fyri økisnevndina, sum skipanin er nú.

Havnarnevndin føst nevnd

Skotið verður eisini upp at hava fasta havnarnevnd í staðin fyri vinnunevndina. Málsøkini millum havnarnevndina og fíggjarnevndina/vinnunevndina undir fíggjarnevndini verða so býtt millum tær báðar nevndirnar.

Vinnunevndin skal viðgera vinnumál og vinnupolitikk, ferðavinnu, handils- og tænastuvinnu, hýruvognsloyvi og Hugskotið.

Nevndin skal leggja síni tilmæli fyri fíggjarnevndina at bera víðari í skipanini. 

Býráðið fer á fundinum í morgin eisini at manna allar nevndirnar.