Inger Støjberg skal fyri ríkisrætt

Inger Støjberg, fyrrverandi útlendinga- og integratiónsmálaráðharri, skal fyri ríkisrætt.

Tað er niðurstøðan hjá danska Javnaðarflokkinum, sum júst hevur havt fund um málið.

Sostatt er meiriluti í Fólkatinginum fyri, at hon skal fyri ríkisrætt, skrivar DR.

- Tingmanningin hjá okkum tekur undir við, at málið skal fyri ríkisrætt, skrivar forsætisráðharrin og forkvinnan í danska Javnaðarflokkinum, Mette Frederiksen. 

Hon vísir á, at avgerðin byggir á tær greiðu løgfrøðiligu niðurstøðurnar, sum eru komnar fram.

Vinstriflokkurin eisini fyri

Eisini Vinstriflokkurin, har Inger Støjberg er limur, tekur undir við at reisa ríkisrættarmál.

Tað upplýsir formaðurin, Jakob-Ellemann Jensen. Hann sigur, at níggju av tingmanningini atkvøddu ímóti.

Sostatt taka allir flokkar í Fólkatinginum uttan Nye Borgerlige og Danski fólkaflokkurin undir við at reisa ríkisrættarmál móti Inger Støjberg.

Tað er sættu ferð, at ríkisrættarmál verður reist í Danmark.