Kunngerð um óljóð styggir útlendsk skip

Oljuvinnufelagið mælir staðiliga frá at seta kunngerðina um óljóð frá skipum í gildi soleiðis, sum hon nú er orðað.

Uppskotið er ikki búgvið.

Oljuvinnufelagið sigur, at sum skilst er uppskotið serføroyskt, og tí eru ongar samanberingar við líknandi reglur í okkara grannalondum.

Felagið sigur, at ásetingarnar um markvirði eru ikki nóg væl grundaðar. 

Tað er eisini ógreitt, hvar keldan til óljóðið, sum skal mátast, skal vera, hvussu óljóðið skal mátast, og hvør hevur heimild til at máta og áseta virðið á óljóðinum.

Velja aðrar havnir

Og hvat skulu skiparar á útlendskum skipum fáa at vita, tá teir koma til bryggju í Føroyum, spyr Oljuvinnufelagið. 

Ógreiðu reglurnar í Føroyum gera, at útlendsk skip heldur velja havnir í øðrum londum enn havnir í Føroyum.

Tí er kunngerðin kappingaravlagandi.

Tað kann tí fáa óbótaligan skaða fyri føroyska vinnu, um kunngerðin verður sett í gildi, soleiðis sum hon nú er orðað, sigur Oljuvinnufelagið.