Torført at gera niðurstøðu við einum tilburði

Sjúkugongdin hjá tí, sum er smittaður við bretska frábrigdinum av kronasmittuni, er meinlík henni hjá øðrum, sum hava fingið koronusmittuna. 

Tað sigur Lars Fodgaard Møller, landslækni, nú bretska frábrigdið eisini er staðfest í Føroyum. 

Landslæknin ger vart við, at tað er torført at gera nakað niðurstøðu út frá einum smittutilburði av bretska frábrigdinum.

14 dagar

Størsti munurin hjá teimum, sum fáa bretska frábrigdið av koronu, er, at tey skulu sita longur í sóttarhaldi, 14 dagar í staðin fyri 10 dagar, sum er tað vanliga. 

Annars broytir tað ikki stórvegis upp á smittustøðuna, at bretska frábrigdið nú er funnið í Føroyum, segði Lars Fodgaard Møller, landslækni, í útvarpinum í gjárkvøldið. 

Í løtuni bendir einki á, at onnur í Føroyum eru smittað við bretska koronufrábrigdinum, siga heilsumyndugleikarnir.