Atkvøða um barsilsuppskotið 9. februar

Enn er ógreitt, hvørja lagnu uppskotið fær, hóast Johan Dahl er farin í part við andstøðuni í hesum málinum

Andstøðutinglimir eiga uppskotið um at javnseta samkynd við hinskynd í barsilsskipanini, men tað er ógreitt, hvørja lagnu uppskotið fær, hóast Johan Dahl, samgongutingmaður, tekur undir við tí

Johnsigurd Johannesen

27.01.2021 - 14:58

Nú er greitt, at løgtingið fer at atkvøða um uppskotið um at javnseta samkynd við hinskynd í barsilsskipanini týsdagin 9. februar.

Tá kemur málið til aðru viðgerð.

Átta tingfólk í andstøðuni hava lagt uppskotið fram. Tey eru Ingilín Didriksen Strøm, Djóni Nolsøe Joensen, Jóhannis Joensen, Bjørt Samuelsen, Beinta Løwe, Hervør Pálsdóttir, Bjarni Kárason Petersen og Ruth Vang.

Málið hevur verið í vinnunevndini, og í álitinum frá nevndini er Johan Dahl, samgongutingmaður, farin í part við andstøðuni.

Samgongan ikki klár

Tað hevur ljóðað, at samgongan arbeiðir við einum uppskoti um at broyta barsilsskipanina. Men Bárður á Steig Nielsen, løgmaður, segði við útvarpið á middegi, at hetta uppskotið verður ikki lagt fram, áðrenn uppskotið frá andstøðuni kemur til atkvøðugreiðslu.

Og nú er greitt, at uppskotið frá andstøðuni kemur til aðru viðgerð á tingfundinum týsdagin 9. februar. Tá verður eisini atkvøtt um málið.

Í løtuni er óvist, hvørja lagnu uppskotið fær, hóast Johan Dahl tekur undir við tí.