Sjey fólk hava ongastaðni at fara

Hóast fólk eru liðugt viðgjørd á sjúkrahúsi, vera tey verandi har, tí tey hava ongastaðni at fara.

Í løtuni eru sjey fólk í føroysku sjúkrahúsunum, tí tey hava onga aðrastaðni at fara. 

Tað sigur Kaj Leo Holm Johannesen, landsstýrismaður, í svari til Jóhannis Joensen, løgtingsmann.

Fýra av teimum sjey fólkunum eru 67 ár ella eldri.

44 fólk í fjør

Í fjør hýstu sjúkrahúsini 44 fólkum, sum annars vóru liðugt viðgjørd. Tey høvdu 1101 dagar.  

Frá 1.januar til 18.februar í ár hava tey verið 18, tilsamans høvdu tey 381 dagar í sjúkrahúsunum. 

Tey, sum eru undir 67 ár, hava verið upp í 281 dagar í sjúkrahúsi eftir, at viðgerðin har var liðug.

Miðaltalið er 68 dagar.  Tey, sum eru 67 ár ella eldri, hava verið í sjúkrahúsi upp í 88 dagar.

Har er miðaltalið 15 dagar.