Hjálparpakkar til viðgerðar í dag

Løgtingið skal viðgera hjálparpakkarnir til ferðavinnuna og listafólk í dag.

Tingfundurin í dag er klokkan 11.00.

Treytin fyri at fáa pengar úr hjálparpakki fýra, sum nú er í løgtinginum, er, at umsøkjarin í stuðulstíðarskeiðinum hevur minst 40 prosent afturgongd í umsetninginum.

Stuðulin er í mesta lagi 10 milliónir krónur til hvønn umsøkjara, og stuðulstíðarskeiðið er frá 1.september 2020 til 30.apríl 2021.

Mett verður, at hjálparpakki fýra kostar í mesta lagi 47,5 milliónir krónur.

Stuðulsskipan til listafólk

Ætlanin er at gera eina stuðulsskipan til listafólk, sum er lík teirri skipan, sum var í fjør.

Men nú kunnu listafólk, sum hava virksemið skipað í ein løgfrøðiligan persón, so sum smápartafelag, eisini søkja.

Uppskotið umfatar fíggjarligt tap í tíðarskeiðnum 1.september í fjør til 30.apríl í ár. 

Stuðulin kann í mesta lagi vera 75 prosent av staðfestum og skjalprógvaðum tapi. Tapið skal í minsta lagi vera 10.000 kr.
 
Løgtingið er biðið um 3,5 mió. kr. til endamálið.