Flokkur vil leingja fosturtøkumarkið til 22 vikur

Í Noregi er fosturtøkulógin aftur komin á politisku dagsskránna. Fleiri flokkar vilja leingja markið fyri fosturtøkum úr 12 upp í 18 til 22 vikur, skrivar Ritzau.

Í dag kunnu kvinnur í Noregi fáa framt fosturtøkur í serligum førum eftir 12 viku um ein fosturtøku-nevnd góðkennir fosturtøkuna.

Og tað er júst fosturtøku-nevndina, sum Sosialistiski Vinstriflokkurin, Arbeiðaraflokkurin, Tey Grønu og Vinstri vilja taka av.

Fellur ikki í góða jørð allastaðni

Sosialistiski Vinstriflokkurin vil, at frí fosturtøka skal vera til 22. viku, ímeðan aðrir flokkar halda markið skal vera 18 vikur.

Uppskotið er ikki fallið í góða jørð allastaðni í Noregi. Felagsskapurin hjá jarðarmøðrunum heldur ikki, at tað er í lagi at leingja um markið fyri fríaru fosturtøku.

– Núverandi fosturtøkulóg verjir bæði barnið og rættin hjá mammuni til sjálvsavgerðarrættin á ein skilagóðan hátt, sigur Hanne Charlotte Schjelderup, leiðari í felagsskapinum.

Solberg sinnað at endurskoða lógina

Forsætisráðharrin, Erna Solberg, heldur, at verandi lóggáva er góð, men hon er samstundis eisini sinnað at kjakast um leiklutin hjá fosturtøku-nevndini.

Fosturtøkumarkið í Føroyum er 16 vikur. Er kvinnan undir 18 ár og ikki gift, skal samtykki fáast til vega frá tí ella teimum, sum hevur foreldramyndugleikan.

Er kvinnan gift og livir saman við manninum, skal maðurin hava møguleika at úttala seg, um ikki serligar orsøkir tala ímóti hesum, stendur í føroysku lógini.