Frádrátturin verður 100.000 krónur næsta ár

Skattafrádrátturin fyri húsaleigu lækkar ikki aftur í 2022. Tí í næstu tingsetu kemur uppskot um at lata hann vera 100.000 krónur, men avgjørt er ikki í hvussu nógv ár, hann verður galdandi.

Jørgen Niclasen, landsstýrismaður, hevur svarað spurningi frá Una Rasmussen, løgtingsmanni. Í 2019 hækkaði frádrátturin úr 50.000 krónum upp í 100.000 krónur.

Hann hækkaði fyri at fáa fólk at langtíðarleiga fólki í Føroyum bústað í staðin fyri at stutttíðarleiga gjøgnum Airbnb.

Hevur havt ávirkan

Jørgen Niclasen svarar, at enn ber ikki rættiliga til at siga, um frádrátturin hevur havt ætlaðu ávirkanina. Tí í fjør komu ikki nógv ferðafólk til Føroya.

Tó síggjast ábendingar um, at hækkingin í frádráttinum hevur havt eina ávirkan, sigur landsstýrismaðurin. 

Leigumálini, sum vórðu uppgjørd eftir bruttoskipanini um skattafrádrátt, øktust í 2019. Tølini fyri 2020 eru ikki komin enn.